Pages

मिथिलाक पर्यायी नाँवसभ

मिथिलाभाषाक (मैथिलीक) बोलीसभ

Tuesday, 1 November 2011

पद्य - ‍१९ - हम कनितहु, कानि ने सकइत छी

 हम कनितहु, कानि ने सकइत छी 
 (गीत) 



सौभाग्य  जे  प्रिय  अहँ  नारी  थिकहुँ,
                            नोरहु   केर    भाषा   जनइत   छी ।
पर   हमर    विवशता    तऽ    देखू,
                           हम  कनितहु, कानि  ने  सकइत छी ।।



की  हाल  कहू,  हम  अहँ सँ  प्रिय,
                                सब हाल तऽ  अपने  जनितहि  छी ।
हम  एहि  ठाँ  दूर,  अहाँ  सँ  प्रिय,
                                चुप रहितहुँ सदिखन,  कनितहि छी ।।

हर एक  क्षण  अहाँ  हमर  सन्मुख,
                                हम  याद   अहीं  केँ  करइत  छी ।
अछि  भेल  जेना  निन्नहु   उन्मुख,
                               भरि   राति   तरेगन  गनइत  छी ।।

चन्ना  मे  देखि  अहँक  मुख  छवि,
                               जँ  धीर  कने   हम   धरइत  छी ।
तऽ  देखि   कलंक,  प्रिय   अहँ  केँ,
                              चानहु   बुझबा  सँ    डरइत   छी ।।

हे  प्राण   हमर  अहँ   जुनि   पुछू,
                             हम अहँ बिनु  कोना  कऽ रहइत छी ।
संदेह   करब  अहँ   जुनि   कनिञो,
                             हम  अहीँ  केर   पूजा  करइत छी ।।

सौभाग्य  जे  प्रिय  अहँ  नारी  थिकहुँ,
                            नोरहु   केर    भाषा   जनइत   छी ।
पर   हमर    विवशता    तऽ    देखू,
                           हम  कनितहु, कानि  ने  सकइत छी ।।

 
विदेहपाक्षिक मैथिली इ पत्रिका, वर्ष , मास ४७, अंक ९३, ‍दिनांक - १ नवम्बर २०११, स्तम्भ ३॰७ मे प्रकाशित ।


No comments:

Post a Comment