पद्य - ‍२‍३४ - घोरन (बाल कविता)

घोरन (बाल कविता)

चुट्टी सनि छी   वा चुट्टी छी,

चुट्टीसँ  किछु  भिन्नहु छी ।

चुट्टा सनि  छी  रूप  मुदा,

संतोला   रंगक  ई   छी ।।*‍^१

आम या जामुन केर गाछ पर,

रहइछ    प्रायः    सोहरल ।

जखने केओ  चढ़ैछ  गाछ पर,

ओकरा   देहमे    लुधकल ।।

आमक गाछक पात सीबि कऽ,

गोल - गोल  खोंता  बनबए ।

चुट्टा सनि ई जीव छी घोरन,

आ  “घोरन छत्ता”  बनबए ।।*‍^२

अपना  देशक  वन्य  भागमे,

जन - जातिक आहार थिकै ।

भुजिया चटनी बहुत चहटगर,

अम्मत खटगर स्वाद थिकै ।।*‍^३

पात  सीबैछ,  तेँ   अंग्रेजीमे,

 ‘वीवर ऑण्ट’ छै नाम ओकर ।

‘ग्रीन’ माने जंगल सेहो होइए,

‘ग्रीन ऑण्ट’ सेहो नाम ओकर ।।*‍^४

संकेत आ किछु रोचक तथ्य -

*‍^१ - मोटा-मोटी जँ देखी तँऽ घोरन सेहो चुट्टीएक (चुट्टीअहिक) प्रभेद छी, मुदा तथापि अपन विशिष्टताक कारणेँ ई चुट्टीसँ फराक छी ।

*‍^२ - आम, जामुन आदि गाछक स्वस्थ पातकेँ सीबि (सिउबि) कऽ घोरन रहबाक लेल घऽर बनबैछ जकरा “घोरनक छत्ता” (COMB OF A WEAVER / GREEN ANT) कहल जाइत अछि । सिउब = सीअब वा सीयब; सिउबैछ = सीबैछ ।

*‍^३ - अपना देशक जनजातिय भागमे आ विश्वमे आन बहुतहु ठाम घोरनकेँ भूजि कऽ वा चटनी बनाए कऽ वा आन तरहेँ खाएल जाइत अछि ।

*‍^४ - पात सीबि कऽ छत्ता बनएबाक कारण अंग्रेजीमे एकरा “वीवर अण्ट” (WEAVER ANT) आ गाछ पर रहबाक कारण “ग्रीन अण्ट” (GREEN ANT) कहल जाइत अछि । एहि ठाम ग्रीन (GREEN) केर मतलब हरियर रंग नञि अछि अपितु जंगल अछि ।

मैथिली पाक्षिक इण्टरनेट पत्रिका “विदेह” केर ‍219म अंक (‍01 जनबरी 2017) (वर्ष 10, मास 110, अंक ‍219) केर “बालानां कृते” स्तम्भमे प्रकाशित ।

पद्य - ‍२‍३३ - देबाड़ या दिबाड़ (बाल कविता)

देबाड़ या दिबाड़ (बाल कविता)

कतबहु हो  मजगूत  मकान ।

चाहे  हो  परोपट्टाक  शान ।

भूकम्प - बाढ़ि - अन्हररोधी ।

या  तड़ितपात - ठनकारोधी ।

पर तइयो ने अजर - अमर बुझियौ, कारण एक्कर छी दिबाड़ ।।

छी  दिबाड़  बड़  ढीठ  जीव ।

बड़ असंजाइत  नाशी ई जीव ।

भीजल - भू छाहरि एकर डीह ।

नञि सुखलहुमे ई करैछ पीठ ।

ओ रक्षित नञि स्थान कोनहु, पहुँचए नञि जाहिठाँ ई दिबाड़ ।।*‍^‍१

छी भाँति - भाँति केर रंग रूप ।

जल - थल सभठाँ भेटै ई भूप ।

किछु लागै  उजरा चुट्टी सनि ।

किछु   उड़ैबाला   कीड़ी   सनि ।*‍^२

हर  निर्माणक  ढाहैछ  अहं,  जे छोट जीव  कहबैछ  दिबाड़ ।।

संकेत आ किछु रोचक तथ्य -

*‍^१ - दिबाड़ यद्यपि भीजल (वा नम वा आर्द्र) आ छाहरियुक्त स्थान पर बेसी भेटैत अछि मुदा सही कही तँऽ धरतीक दूनू ध्रुवीय (आर्कटिक ओ अण्टार्कटिक) प्रदेशकेँ छोड़ि विश्वमे सभठाँ भेटैत अछि ।

*‍^२ - दिबाड़केँ अंग्रेजीमे व्हाइट ऑण्ट (WHITE ANT = उजरा चुट्टी) कहल जाइत अछि । सम्भवतः तेँ कल्याणी कोशमे एकरा चुट्टीक एक प्रकार कहल गेल अछि मुदा जीव विज्ञानक अनुसारेँ ई चुट्टीक प्रकार नञि अछि अपितु जैविक क्रमविकाशमे चुट्टीसँ बहुत दूर अछि । उनटहि दिबाड़ जैविक क्रमविकाशमे सनकिड़बाक बेसी नजदीक अछि ।

मैथिली पाक्षिक इण्टरनेट पत्रिका “विदेह” केर ‍219म अंक (‍01 जनबरी 2017) (वर्ष 10, मास 110, अंक ‍219) केर “बालानां कृते” स्तम्भमे प्रकाशित ।

पद्य - ‍२‍३२ - कठसुग्गी / कठसुगीया (बाल कविता)

कठसुग्गी / कठसुगीया (बाल कविता)

हरियर हरियर चिड़ै छै बैसल ।

बऽड़क फऽड़  भखै छै  बैसल ।

नञि सुगवा-सीकी ने हरियल ।

नाम ओकर कह बुच्ची !! *‍^‍१

लोल ओकर मजगूत लगै छै ।

ठक् - ठक् गाछक काठ खोधै छै ।

ठोस लोल  आबाज  करै छै ।

छै ने मुदा कठखोद्धी ।।*‍^२

सूर्योदय खन बड़ चहकै छै ।

मुदा ने  तकलासँ  भेटै छै ।

जानि कतए ओ नुका रहै छै ।

हड़बड़ाए देखि लुक्खी ।।*‍^३

बच्चा हरियर रंग गात छै ।

चेतन गर्दनि-माथ लाल छै ।

जहिना बऽड़क फऽड़ - पात छै ।

नाम ओकर कठसुग्गी ।।*‍^४

संकेत आ किछु रोचक तथ्य -

*‍^१ - हरियर रंगक चिड़ै सभमे अपना दिशि सभसँ प्रशिद्ध अछि सुग्गा आ हरियल । सुगवा सीकी सेहो हरियर रंगक होइत अछि । एहि कवितामे वर्णित चिड़ै सेहो हरियर रंगक अछि मुदा एहिठाँ नामित चिड़ै सभमेसँ नञि अछि ।

*‍^२ - एहि कवितामे वर्णित चिड़ैकेँ मजगूत लोल होइत छै जाहिसँ ओ गाछक काठकेँ खोधि अपना रहबा लेल घऽर बनबैत अछि । सक्कत लोलसँ काठ पर प्रहार करबाक कारणेँ ठक् - ठक् केर स्इष्ट ध्वनि सेहो कर्णगोचर होइत अछि । मुदा तथापि ओ कठखोद्धी नामक चिड़ै नञि अछि ।

*‍^३ - सूर्योदय खन सूर्य पहिल किरण पड़लाक लगभग एक घण्टा धरि ई चिड़ै खूब जोर - जोरसँ चहचहाइत अछि मुदा गाछक नीचाँ ठाढ़ भए ऊपर तकला पर देखबामे नञि अबैत अछि वा बड्ड मोश्किलसँ गोटेक - दूटा देखाइ दैत अछि । एकर मुख्य कारण ओहि चिड़ै केर रंग अछि जे गाछक पात पर पड़ैत सूर्य किरणसँ हू-ब-हू मेल खाइत अछि ।

*‍^४ - कठसुग्गीक उपरुका लोलक ठीक ऊपर कड़गर नम्मा केस सदृश किछु संरचना होइत अछि जकरा अंग्रेजीमे बॉर्ब (BARB) कहल जाइत अछि । तेँ कठसुग्गीकेँ अंग्रेजीमे बार्बेट (BARBET) नामक चिड़ै कहल जाइत अछि । कठसुग्गीक कएक टा भेद - प्रभेद अछि जकरा जीवविज्ञानमे अलग-अलग जातिक (Species) रूपमे वर्गीकृत कएल गेल अछि । एहिमेसँ एकटा भेद जे अपना दिशि खूब भेटैत अछि, से अछि लाल माथ बला कठसुग्गी (COPPERSMITH BARBET) जकर वयस्कावस्थामे माथक ऊपर सुन्नर लाल रंगक मुकुट सनक संरचना रहैत अछि । एहने लाल रंगक संरचना गर्दनिपर अगिला भागमे सेहो रहैत अछि । एहि चिड़ै केर बाल्यकालमे एहि तरहक कोनहु लाल संरचना नञि रहैत अछि । एकर रंग आ बगए - बानी भोरुका रौद पड़ैत बऽड़क पातक ओ फऽड़क रंगसँ तेना ने मेल खाइत अछि कि सोझाँ रहितहुँ मनुक्खक आँखिकेँ ता धरि चिन्हबामे नञि आबैत अछि जा धरि ओ कोनहु प्रकारक हलचल नञि करैछ ।

     अपना दिशि बेसी भेटए बला कठसुग्गीक दोसर प्रकार अछि भूरा या मटियाही माथ बला कठसुग्गी (BROWN HEADED BARBET) जकर जीवनकालक कोनहु अवस्थामे गर्दनि ओ माथ पर लाल रंगक कोनहु संरचना नञि होइत अछि । एकर माथ ओ गर्दनिक रंग भूरा या गाढ़ मटियाही रंगक होइत अछि ।

मैथिली पाक्षिक इण्टरनेट पत्रिका “विदेह” केर ‍218म अंक (‍15 जनबरी 2017) (वर्ष 10, मास 109, अंक ‍218) केर “बालानां कृते” स्तम्भमे प्रकाशित ।