( वि दे ह - प्रथम मैथिली पाक्षिक ई - पत्रिका (ISSN 2229-547X VIDEHA) , अंक - ८८, ८९, ९० (अगस्त - सितम्बर २०११) सँ साभार )
मेघ
 |
हम मेघ थिकहुँ धरतीवासी, ई जीवन हमरहि आनल अछि ।
..................................................................................................................
नञि दोष हमर जँ हो अनिष्ट, आ नाचथि ताण्डव महाकाल ।।
(छायाकार :- डॉ॰ शशिधर कुमर)
|
हम मेघ थिकहुँ, धरतीवासी ! ई जीवन हमरहि आनल अछि ।
नञि गोर जदपि हम छी कारी, पर स्नेह सुधा संग आनल अछि ।।
जखन – जखन एहि भूतल पर,
रविकिरणक साहस बढ़ैत गेल ।
सभ जीव जन्तु , गाछी बिरछी,
जल विन्दु-विन्दु ले तरसि गेल ।
एहि दारुण दुःख मे संग तोहर, हर बेर हृदय मोर कानल अछि ।
हम मेघ थिकहुँ, धरतीवासी ! ई जीवन हमरहि आनल अछि ।।
हर आह हमर शीतल बसात,
नोरक हर बुन्न बनल अमृत।
लहलहा उठल खेतक जजाति,
हर जीव तृप्त, धरती संसृत ।
स्वागत मे सदिखन आदिकाल सँ मोर मुदित मन नाचल अछि ।
हम मेघ थिकहुँ, धरतीवासी ! ई जीवन हमरहि आनल अछि ।।
हर सड़सि ताल सरिता निर्झर,
वन उपवन हमरहि सँ शोभित ।
हर जड़ि चेतन केर प्राण हमहि,
छी रग मे हमहीं बनि शोणित ।
हमरहि निर्मित ई सकल स्वर्ग , हमरहि वसन्त ई आनल अछि ।
हम मेघ थिकहुँ, धरतीवासी ! ई जीवन हमरहि आनल अछि ।।
नञि दोष हमर, जँ हो अनिष्ट,
आ नाचथि ताण्डव महाकाल ।
जलमग्न धरा, बाढ़िक कारण,
आ देखि पड़य कत्तहु अकाल ।
सोचू एहि मे अछि दोष ककर ? की नियम अहाँ सभ मानल अछि ?
हम मेघ थिकहुँ, धरतीवासी ! ई जीवन हमरहि आनल अछि ।।
हम मैथिल ! मिथिला केर सन्तान
 |
की होयत सोचि भविष्य विषय, हम तऽ अतीत केर करी गान ।
|
हम मैथिल ! मिथिला केर सन्तान ।
नञि दुनिञा केर कनिञो ध्यान ।
की होयत सोचि भविष्य विषय, हम तऽ अतीत केर करी गान ।
हम मैथिल ! मिथिला केर सन्तान ।।
नञि दुनिञा सँ, कनिञो घबड़ायब ।
नञि प्रगति देखि कऽ हम ललचायब ।
छल हमर अतीत बहुत सुन्नर,
तेँ रहत भविष्यहु नीक हमर ।
की अजगर करइत अछि चिन्ता ? अरे सबहक दाता , अपनहि राम ।
हम मैथिल ! मिथिला केर सन्तान ।।
विज्ञानक द्वारि, अशान्तिक द्वारि ।
एहि सँ नीक, बैसी चौपाड़ि ।
करी अराड़ि आ पढ़ी गारि ।
नञि ताहि सँ जीती, करी मारि ।
अछि फॉर्मूला - परिभाषा व्यर्थ ।
चान – विजय अभिलाषा व्यर्थ ।
की धरती’क चान अलोपित अछि , जे करी गगन चानक अभियान ?
हम मैथिल ! मिथिला केर सन्तान ।।
हम मानि लेल अहँ सर्वश्रेष्ठ ।
लाठी भाँजए मे छी यथेष्ठ ।
अहँ शूरवीर, अहँ परम वीर ।
अहँ कर्मवीर, अहँ धर्मवीर ।
अहँ माए मैथिलीक पुत्र धीर, जे सहि सकलहुँ माएक अपमान ।
अहँ मैथिल , मिथिला केर सन्तान ।।
बरसातक एक राति
 |
| बहय माटि – पानि दुहु एक साथ ।
(छायाकार :- डॉ॰ शशिधर कुमर)
|
असित अन्हार डेराओनि राति ।
झमकि झमकि बरिसय बरसात ।।
अछि अस्त सूर्य आ धुमिल चान ।
घूमय नभ मे चहुदिशि जलधर ।
करय गरजि गरजि कऽ मेघ नाद ।
रहि रहि चमकए चपला चञ्चल ।
बहए सुरभित शीतल रम्य बसात ।
झमकि झमकि बरिसय बरसात ।।
प्रेमीक विछोह, प्रेमिकाक क्षोभ ।
मयूरक खुशी अह्वलादित नर्तन ।
गर्मी सँ त्रस्त – पाओल राहत ।
करय जीव पावसक अभिनन्दन ।
पाओल राहत सभ कृषक समाज ।
झमकि झमकि बरिसय बरसात ।।
उमड़ल पोखड़ि, नदी, ताल,सड़सि ।
हर्षित ओ जन्तु जे जल सञ्चारी ।
करए दादुर, जोंक, साँप, सहसह ।
पसरल सौंसे धरती पर चाली ।
बहए माटि – पानि दुहु एक साथ ।
झमकि झमकि बरिसय बरसात ।।
पावस राति - ई कारी घोर ।
पुरिबा – पछबा से बड़ जोड़ ।
भेल भोर, पर रौद मलीन ।
सूर्य जेना निज शक्ति विहीन ।
कहुँ – कहुँ हंसक उनमुक्त पसार ।
झमकि झमकि बरिसय बरसात ।।
 |
भेल भोर, पर रौद मलीन ।
सूर्य जेना निज शक्ति विहीन ।
कहुँ – कहुँ हंसक उनमुक्त पसार ।
|
नभ श्याम, धरा श्याम, सभ श्यामल श्यामल
 |
| नभ श्याम, धरा श्याम, सभ श्यामल - श्यामल । आइ लगइछ प्रकृति श्याम रंग मे रँगल ।। (छायाकार :- डॉ॰ शशिधर कुमर) |
नभ श्याम, धरा श्याम, सभ श्यामल श्यामल ।
आइ लगइ’छ प्रकृति श्याम रंग मे रँगल ।।
सुनि मुरलीक तान ।
एलीह राधा ओहि ठाम ।
प्रीति सरिता मे डूबि, भेलीह राधहु श्यामल ।
आइ लगइ’छ प्रकृति श्याम रंग मे रँगल ।।
श्याम श्यामक शरीर ।
श्याम यमुनाक नीर ।
पहीरि साँझक कलेवर , भेलीह वसुधहु श्यामल ।
आइ लगइ’छ प्रकृति श्याम रंग मे रँगल ।।
छवि सुन्नर सहज ।
मूँह रक्तिम जलज ।
रक्त कंज बीच खिलल युगल श्यामल कमल ।
आइ लगइ’छ प्रकृति श्याम रंग मे रँगल ।।
श्याम अलकक कुञ्ज ।
जेना भ्रमरक हो पुञ्ज ।
भासि राहु कोर, चान सेहो श्यामल श्यामल ।
आइ लगइ’छ प्रकृति श्याम रंग मे रँगल ।।
घीरि आयल पयोद ।
देखू नचइ’छ कामोद ।
छूबि श्याम, श्याम, श्याम भेल अनिलहु श्यामल ।
नभ श्याम, धरा श्याम, सभ श्यामल श्यामल ।।
 |
लागय आजु धरा मनभाओन, कि चलु सखि, चऽलू ने सखी ।
(छायाकार :- डॉ॰ शशिधर कुमर)
|
आयल साओन मास सोहाओन,
कि चलु सखी , चऽलू ने सखी ।
लागय आजु धरा मनभाओन,
कि चलु सखी , चऽलू ने सखी ।।
छल छल बहइ’छ श्यामा सरिता ।
भेल मलिन मुख देखि ई सविता ।
बहु विधि सजल धजल वृंदावन,
कि चलु सखी , चऽलू ने सखी ।
आयल साओन मास सोहाओन,
कि चलु सखी , चऽलू ने सखी ।।
मन्द पवन सखी वसन हिलावय ।
मन मानस मोर मदन जगावय ।
बाजय छमकि छमकि पायलिया,
कि चलु सखी , चऽलू ने सखी ।
लागय आजु धरा मनभाओन,
कि चलु सखी , चऽलू ने सखी ।।
सभ सखि मीलि चलू रास रचायब ।
कदमक डाड़ि मे हिरला लगायब ।
बजओता माधव मधुर मुरलिया,
कि चलु सखी , चऽलू ने सखी ।
आयल साओन मास सोहाओन,
कि चलु सखी , चऽलू ने सखी ।।
बसात (हवा)
 |
| नञि मूर्त रूप पओलक कहियो, पर दिव्य शक्ति संवरने अछि ।
(छायाकार :- डॉ॰ शशिधर कुमर)
|
ओ शिल्पकार छी एहि धरतीक, नञि जानि कते की रचने अछि ।
स्पर्श मात्र कए सकइत छी , निज आँखि सँ देखब सपने अछि ।।
ब्रम्हा बनि कखनहु सृजन करय,
कहुखन हर रूप कराल धरय ।
कहुखन हरि सम पालनकर्त्ता,
कहुखन यम - सद्यः काल बनय ।
ओ जिनगी छी एहि धरती केर,
सभ जीवक साँस समाहित अछि ।
एहि धरती पर जे रिक्त लगय,
ओहि शुन्यक बीच प्रवाहित अछि ।
नञि मूर्त रूप पओलक कहियो, पर दिव्य शक्ति संवरने अछि ।
ओ शिल्पकार छी एहि धरतीक, नञि जानि कते की रचने अछि ।।
ओ योगवाहि, की नञि बुझल ?
ओ कऽ सकैछ ककरो संगति ।
जकरा संग, जा धरि मीत रहय,
तकरे सन गुण, तकरे रंगति ।
के नञि जनैछ पुरिबा – पछिबा,
मलयक बसात के नञि जनइछ ।
ककरा नञि अनुभव चक्रवात,
लू – जेठक दुपहरिया तपइत ।
अनल, अनिल केर संग पाबि, सोनक लंका केँ डहने अछि ।
ओ शिल्पकार छी एहि धरतीक, नञि जानि कते की रचने अछि ।।
कहुखन एकसरि सरिता जल पर,
जनु जलतरंग ओ बजा रहल ।
कखनहु मरु मे वा सागर तट,
लीखि बालु सँ अपने मेटा रहल ।
ओकरा सोझाँ, के रहल अडिग,
बिनु दर्प – दलित, के रहल ठाढ़ ?
कत विटप उखाड़ल, सिन्धु मथित,
भासित पहाड़, अपचित पठार ।
अगनित पाथर केँ काटि – छाँटि, कत रूप - अनूप ओ गढ़ने अछि ।
ओ शिल्पकार छी एहि धरतीक, नञि जानि कते की रचने अछि ।।
“विदेह” पाक्षिक मैथिली इ – पत्रिका, वर्ष – ४ , मास – ४५ , अंक – ९०, दिनांक - १५ सितंबर २०११ मे प्रकाशित ।
हे प्रिय ! अहँक सुन्नर मुखड़ा
हे प्रिय ! अहँक सुन्नर मुखड़ा,
गहुमक रोटी सन गोल गोल ।
ने रक्त अधिक, ने श्याम प्रबल,
गहुमहि सन सुन्नर गोड़ गोड़ ।।
अछि मोन लोभाइत देखि – देखि,
दू टा फाँरा आमक अचार ।
संगहि राखल सुन्नर - सुन्नर,
मिरचाइक फर दू गोट लाल ।।
की काज अहाँ केँ एहि रोटीक,
दऽ दियऽ सखी हम भूखल छी ।
आपस कए जुनि सिर पाप धरू,
हम छी अतीथि हम भूखल छी ।।
“विदेह” पाक्षिक मैथिली इ – पत्रिका, वर्ष – ४ , मास – ४५ , अंक – ९०, दिनांक - १५ सितंबर २०११ मे प्रकाशित ।
जे गाबि सकी, से गीत भेल (गजल)*
जे गाबि सकी, से गीत भेल, की गजल - छन्द - कविता - मुक्तक ?
जँ हो जजाति, तऽ खेत भेल, की आढ़ि – धूर – हत्ता - टटहड़ि ??
हम अंगहीन, कोनो अंग विना, पर देह सिमित नञि, अछि व्यापक ।
मुँह – नाक - कान आ पएर - हाथ, छी हमरहि, पर ने हमर पड़तर ।।
कोँढ़ी जँ फुलायल, फूल बनल, गेना – गुलाब – जूही - चम्पक ।
जे फड़य गाछ पर, फऽल कहल, हो आम – लताम – लकुच – कटहड़ ।।
छी वारि एक, पर विविध रूप, अछि जलधि धरा, नभ मे जलधर ।
खन शान्त कूप – पोखड़ि – डबरा, खन चंचल सिन्धु – सरित – निर्झर ।।
कर कलम हाथ लिखबाक लेल, पर मोन पता नञि की लीखत ।
अहँ कहलहुँ “गजल” लिखू - लिखलहुँ, पर गाबि सकब तेँ गीत कहब ।।
अहँ “अनचिन्हार”, परिचित भेलहुँ, पर हम “विदेह” सौंसे सञ्चर ?
उन्मुक्त बसात - चिड़ै सन मन, नहि गजल - गीत, खिस्सो लीखत ।।
 |
| मैथिलीक प्रशिद्ध गजल रचयिता श्री आशीष "अनचिन्हार" जी |
गजल लीखू - से गजल लीखि देल ।
*श्री आशीष “अनचिन्हार” जी केर आग्रह पर तथा हुनिकहि समर्पित ।
नीक संकलन अछि । शुभकामनानीक संकलन अछि । शुभकामना
ReplyDeleteधन्यवाद राखी जी ।
ReplyDelete