पद्य - २७ - ककरा दृष्टि मे नीक, के कह ?

ककरा दृष्टि मे नीक, के कह ?

(कविता)

ककरा  दृष्टि  मे नीक  के कह ?

थिक कक्कर अभिलाषा  ककरा ।।

तन  सुन्नरि हम देखि रहल छी,

मन  सुन्नर - से  कोना  कहू ।

तन  केर सुन्नरता घातक थिक,

जँ सुन्नर मन  केर  बिना रहू ।।

अहँ सुन्नरि छी, बड़ सुन्नरि  छी,

चर्चा   पसरल  सौंसे  जग  मे ।

पर सुन्नरता की थिक - के कह ?

के  एकरा  फरिछाओत जग मे ??

नञि ठोस तरल वा गैस ई थिक,

हो  मानक  परिभाषा   जकरा ।

ककरा  दृष्टि  मे नीक  के कह ?

थिक कक्कर अभिलाषा  ककरा ।।

तन केर सुन्नरता  चञ्चल  थिक,

मन  केर  सुन्नरता   रहए थीर ।

मन सिन्धु  समान अथाह, स्वच्छ,

तन   बरसाती   धाराक   नीर ।।

तन भ्रामक थिक, तन नश्वर थिक,

नहि  प्रेमक थिक  ओ परिचायक ।

नञि  तऽ, श्रीकृष्णक  की  हस्ती ,

जे बनितथि  ओ  सभहक नायक ।।

सुनइत   छी   लैला  कारी  छलि,

कोयली  कारी  से  जनितहि  छी ।

आँखिक   पुतरी   होइत’छि   कारी,

गुण एकर विश्व भरि मनितहि छी ।।

हो  तन  सुन्नर,  हो  मन  सुन्नर,

तऽ  एहि सँ  बढ़ि कऽ की  होयत ?

नहि  चरम  मेल  दुहु  केर सम्भव,

जँ  होयत,  तऽ  बढ़ि  की होयत ??

 

“विदेह” पाक्षिक मैथिली इ – पत्रिका, वर्ष – ४, मास – ४८, अंक – ९५, ‍दिनांक - १ दिसम्बर २०११, स्तम्भ ३॰७ मे प्रकाशित ।