पद्य - ‍१०५ - भेटत मजूर कतऽ - मिथिलाकेर बच्चा (कविता)

भेटत मजूर कतऽ - मिथिलाकेर बच्चा

चुनावक बोखार छै,

सभ केओ बेहाल छै,

तकनहु  भेटैछ   केओ,  नेता  ने  सुच्चा ।।

मिथिलाक आँच पर,

रोटी अछि सेकि रहल,

मिथिलेकेँ  बेचि  रहल,  लबड़ा  आ लुच्चा ।।

भाषणमे मिथिला छै,

भाषणमे मैथिली,

घऽर  ओकर – मैथिली  बूझय  ने  बच्चा ।।

मिथिलाक जनगण छै,

दिल्ली आ पटना लए,

भोटक  जोगार  बस,  जीत   बुझू  पक्का ।।

योजनाक बात भेल,

देशक बिकाश लेल,

भेटत  मजूर  कतऽ - मिथिला केर  बच्चा ।।

देशक अजादी केर,

सत्तरि अछि लागि रहल,

पर ने  उद्योग  एतए,  नहिञे  छी  धन्धा ।।

सरकारक नीति ई,

नञि जानि केहेन छी,

भोगि रहल कुहरि रहल,  मिथिलाक बच्चा ।।

प्रदेशक जबार भल,

मिथिलाक पात पर,

मड़ुआक  रोटी  अछि,  माँगू  ने  कुच्चा ।।

आन भाग देशक,

जोगार करए पेटक,

पोल्हाबए   कुटुमे  छऽ,  देशे  समुच्चा ।।

हर भाग देशक,

जँ बनतै उत्पादक,

तँऽ  तोँही   कहह,  के  हेतै  उपभोक्ता ।।

'विदेह' १७० म अंक ‍१५ जनबरी २०१५ (वर्ष ८ मास ८५ अंक १७०) मे प्रकाशित । बालानां कृतेमे ।

पद्य - ‍१०४ - चन्दाक धन्धा (कविता)

चन्दाक धन्धा

धियापुता सभ दूइर भऽ रहल,  अपने ठोकि रहल छी  पीठ ।

पढ़बा - लिखबा केर उमेरमे, चन्दा माँगि रहल अछि  ढीठ ।।

सरस्वतीपूजा केर अवसरि,  हाथमे  कलम  आ पोथी नीक ।

पढ़बा - लिखबा छाड़ि कऽ देखू,  चन्दा माँगि रहल निर्भीक ।।

नान्हि – नान्हि टा छौंड़ा – छौंड़ी,  बाँस आ बत्ती हाथ नेने ।

सड़क जाम कऽ चन्दा माँगए,  अपन भविष्यकेँ कात केने ।।

ई  घटना  दृष्टान्त  मात्र  छी,  बैसल छी हम माथ धेने ।

पूजा  हो  वा  ईद – मोहर्रम,  चन्दा केर  सभ साथ धेने ।।

पूजा – पाठ आ धर्म – संस्कृति, हमरा नञि तकरासँ विरोध ।

उचित हरेक संस्कार – संस्कृति, जाधरि ने करइछ गतिरोध ।।

उत्सव – पाबनि – परब – तिहार, जिनगी केर छी रंग हजार ।

बिनु   एकरा  एकरस  जिनगी,  से  हमहूँ  मानै  छी  सरकार !!

पर स्वरूप ई कतेक उचित छी, अपनहिसभ कने करू विचार ।

धियापुता  देशक  भविष्य  छी, कतेक उचित एहेन बेबहार ।।

'विदेह' १७१ म अंक ०१ फरबरी २०१५ (वर्ष ८ मास ८६ अंक १७१) मे प्रकाशित ।

पद्य - ‍१०३ - फागुनक पानि (कविता)

फागुनक  पानि (कविता)

फागुनक  पानि, अकालक पानि ।

तइयो लाभ आ किछु छी हानि ।।

गहूम   पुष्ट,  मज्जर  मजगूत ।

मसुरीक छी   सद्यः   यमदूत ।।

धियापुता   लए  मजगर  बात ।

इस्कूल  बन्दी   छै   बरसात ।।

पुरिबा - पछबा   बहए  बसात ।

ठिठुराबै - कँपबै    छै   गात ।।

बीतल  ठण्ढी  पुनि  घुरि  गेल ।

सोएटर - कम्मल  बाहर  भेल ।।

मुरही - कचड़ी - झिल्ली - चौप ।

चाहक   चुस्की   चौके - चौक ।।

गरम   जिलेबी,   लिट्टी  बेस ।

गरम   सिंघारा    खेपे - खेप ।।

नहिञे    गरजय - तरजय   मेघ ।

टिप्-टिप्-टिप्-टिप् बरिसय मेघ ।।

बरसाती,    छत्ता     की     भेल ?

छोड़ू !  एक  दिनक   छी  खेल ।।

02 MARCH 2015  कऽ प्रकाशनार्थ “विदेह - पाक्षिक मैथिली ई पत्रिका” केर सम्पादकीय कार्यालयकेँ प्रेषित ।

पद्य - ‍१०‍२ - ओ कहलन्हि (कविता)

ओ कहलन्हि (कविता)

ओ कहलन्हि, धुर की लिखै छी, बाउ ई सभ मैथिलीमे ।

छी किए  एते माथ  धुनइत,  अहँ  अनेरो  मैथिलीमे ।।

ज्ञान  ओ  विज्ञान  केर छी,  बात  ऊकरू  मैथिलीमे ।

अहँ कलमकेँ  क्लेश दै छी,  लीखि ई सभ  मैथिलीमे ।।

के बूझत आ की बूझत,  के पढ़त  ई सभ  मैथिलीमे ?

जँ अपन  कल्याण चाही,  जुनि लिखू अहँ  मैथिलीमे ।।

मान  ओ  सम्मान  बिरलेकेँ,   भेटैतछि   मैथिलीमे ।

बजनिहारो  नञि  बुझैतछि,  ओ  बजैतछि मैथिलीमे ।।

राष्ट्रभाषामे  लिखब  तँऽ,  नाम  होयत  देश  भरिमे ।

आङ्ग्लभाषा जँ लिखी,  चर्चा  होयत  सगरो जगतमे ।।

हाथ  आओत  बेस  कैंचा,  की  भेटैतछि  मैथिलीमे ?

मैथिली  केर  क्षेत्र  सीमीत,  के पढ़ैतछि  मैथिलीमे ??

एक  साँसेँ  कहि  सुनेला,  बेस  सभटा   मैथिलीमे ।

हम कहल - संतुष्ट छी हम, लीखि सभटा  मैथिलीमे ।।

राष्ट्रभाषा - आङ्ग्लभाषा – नीक  सभ  भाषा  लगैए ।

मातृभाषा  केर  बिना  पर,  सुन्न सभ भाषा लगैए ।।

जे कहल से भल कहल, छी बेस ओ अपनेक नजरिमे ।

डऽर जञो रहितए समाठक, माथ ने रखितहुँ ऊखरिमे ।।

छी  जनैत  संस्कृत  हम,  अंग्रेजी आ हिन्दी मराठी ।

द्वेष नञि, पर मैथिलीक छी बात अलगे, अलग ठाठी ।।

याद  करू  नेनपन अपन, कहियो जखन थाकल रही ।

पाबि  माएक कोर  तत्क्षण,  केहेन सुख भासल रही ।।

सएह सुख हमरा भेटैतछि, लीखि कऽ किछु मैथिलीमे ।

मानसिक सुख बड़ भेटैतछि,  लीखि हमरा मैथिलीमे ।।

बात  जँ  मानी  हमर  तँऽ, आउ एक बेर मैथिलीमे ।

मान - पैसा - मोह सभटा,  बिसरि जाएब मैथिलीमे ।।

01 FEB. 2015  कऽ प्रकाशनार्थ “विदेह - पाक्षिक मैथिली ई पत्रिका” केर सम्पादकीय कार्यालयकेँ प्रेषित ।

पद्य - ‍१०‍१ - माघ (कविता)

माघ (कविता)

सिहकैत  बसात, ठिठुरैत  माघ ।

ओसक टप्-टप्, कानए अकास ।।

सभ आढ़ि - धूर पर उगल घास ।

ओसेँ  भीजल,  पिछड़ैत   लात ।।

ओसेँ भीजल अछि गाछ - पात ।

टप् - टप् भू पर पानिक प्रपात ।।

पर ओस चाटि की मेटए प्यास ?

एकटा अछार  एखनो छै आश ।।

पछता गहूम  केर  हो ने नाश ।

तेँ दमकलसँ अछि पटैत चास ।।

नाला - पौती अछि बितल बात ।

प्लास्टिकक पाइप संबल उसास ।।

अजगर सनि पसरल  बीच बाध ।

फक् फक् करैत दमकलक साथ ।।

गमछा - मफलर  बन्हने  गाँती ।

चद्दरि – सोएटर  झँपने  छाती ।।

निकलल – जकरा भोरे छै काज ।

काजक  बदलामे  नञि छै लाथ ।।

शीतलहरी   पूसहु   केर   बाद ।

नञि जानि कते दिन रहत आब ।।

कनकनी  एहेन   कँपबैछ  हाड़ ।

तइयो   धड़फड़मे    घटकराज ।।

एहनोमे   धोएबा   लेल   पाप ।

जा  रहल  लोक  दौगल प्रयाग ।।

01 FEB. 2015  कऽ प्रकाशनार्थ “विदेह - पाक्षिक मैथिली ई पत्रिका” केर सम्पादकीय कार्यालयकेँ प्रेषित ।