पद्य - ८४ - बर्खा रानी - ‍१ (बाल कविता)

बर्खा रानी - ‍१

बर्खा    रानी !  आऽ  गे  आऽ ।

राति   अएबेँ,  से  एखने  आऽ ।

इस्कूल  जा - जा  रोजे  थकलहुँ,

आइ  अपन   तोँ   खेल  देखा ।।

(बर्खाक पानि मे भीजि कऽ इस्कूलक आधा रस्ता सँ घऽर आपिस जाइत धिया लोकनि) 

बर्खा    रानी !  आऽ  गे  आऽ ।

राति   अएबेँ,  से  एखने  आऽ ।

इस्कूल  जा - जा  रोजे  थकलहुँ,

आइ  अपन  तोँ   खेल  देखा ।।

एखने  आ,  गए   एखने  आऽ ।

आइ  अपन  नञि  भाओ  बढ़ा ।

एतेक बरस तोँ झमकि झमकि कऽ,

रस्तेँ – पएरेँ   हो   नञि  थाह ।।

बर्खा   रानी !  एहि  ठाँ  आऽ ।

अप्पन  रिमझिम  गीत   सुना ।

दुपहरिया  धरि   खूब   बरसिहेँ,

फेर   कने    लीहेँ    सुस्ता ।।

बर्खा  रानी !  आब  ने  आऽ ।

दम्म   धरै,  तोँ  ले   सुस्ता ।

संगी – साथी     शोर    करैए,

खेलब - कूदब – करब   मजा ।।

उच्चारण संकेत :-

क्रम संख्या	लिखित शब्द	अभिप्रेत उच्चारण
१	अएबेँ	अएबेँ, ऐबेँ, एबेँ,
२	थकलहुँ	थकलहुँ, थकलौं
३	गए	गए, गै, गे
४	झमकि	झमकि, झमैक
५	धरि	धरि, धैर
६	बरसिहेँ	बरसिहेँ, बरैसहेँ
७	रस्तेँ – पएरेँ	रस्तेँ – पेरेँ

डॉ॰ शशिधर कुमर “विदेह”                              

“विदेह” पाक्षिक मैथिली इ – पत्रिका,   वर्ष – ५, मास – ५५,  अंक – ‍१०९,  ‍दिनांक - १५ जुलाई २०१२ , स्तम्भ – बालानां कृते, मे प्रकाशित ।