पद्य - ८६ - अहीं सञो कहै छी

अहीं सञो कहै छी

अहीं सञो कहै छी ।

अहाँ नञि सुनै छी ।

पता  नञि  किए,  आइ  निष्ठुर  बनल छी ।।

अहँ  इजोरिये रही ।

हम अन्हरिये सही ।

हे अए (ऐ) चन्ना, कहाँ हऽम चानी मँगै छी ।।

प्रीति नहिञे सही ।

अनाशक्ते    रही ।

मुदा  घृणित  मनेँ,  किए  नैना  फेरै छी ??

छी हमहूँ मनुक्खे ।

मुदा  दोष  एतबे ।

हृदय मे  अहँक,  प्रेम  प्रतिमा  पूजै  छी ।।

डऽर चोरिक किए ?

बरजोरीक   किए ?

एहेन छी ने पतित,  अहाँ  व्यर्थेँ  डरै छी ।।

डॉ॰ शशिधर कुमर “विदेह”                                

“विदेह” पाक्षिक मैथिली इ – पत्रिका, वर्ष –५, मास –५५,  अंक –‍११० , ‍१५ जुलाई २०१२ मे “स्तम्भ ३॰२” मे प्रकाशित ।