पद्य - ४८ - हे ऐ भौजी, रूसलि किए छी ?

हे ऐ भौजी, रूसलि किए छी ?

(गीत)

होली मे होइतहि  अछि एहिना, रंग अबीर मे, डूबल ई दुनिञा ।

मानव  केर  तऽ बात कहू की, नाचय धरती बनि नवकनिञा ।।

हे अए (ऐ) भौजी, रूसलि किए छी ?

गाल फुला,  चुप बैसलि  किए छी ?

घऽर मे  बैसलि, किए  आँखि  लाल  करै  छी ?

दू बुन्न पड़िए जँ गेल, तऽ किए बबाल करै छी ?

होली मे होइतहि  अछि एहिना,

रंग अबीर मे, डूबल ई दुनिञा ।

मानव  केर  तऽ बात कहू की,

नाचय धरती बनि नवकनिञा ।

किए  कोप - भवन मे,  अहाँ  कपार  धुनै छी ?

दू बुन्न पड़िए जँ गेल, तऽ किए बबाल करै छी ?

खेलथि ब्रज मे गोपी केर संग,

कृष्णजी     रंग     अबीर ।

मिथिला मे फगुआ अछि नामी,

दियऽर  भाउजि   केर  बीच ।

किए   आइ   अहाँ,   हड़ताल   कएने   छी ?

दू बुन्न पड़िए जँ गेल, तऽ किए बबाल करै छी ?

रूसू जुनि, हम करै छी भौजी,

हाथ     जोड़ि     नेहोरा ।

एक बरख केर बादहि आओत,

पाबनि    फेर     दोबारा ।

किए  स्नेहक  हाथ  अपन,  कात  कएने  छी ?

दू बुन्न पड़िए जँ गेल, तऽ किए बबाल करै छी ?

“विदेह” पाक्षिक मैथिली इ – पत्रिका, वर्ष –५, मास –५१, अंक –‍१०१ , ‍०१ मार्च २०१२ मे “स्तम्भ ३॰७” मे प्रकाशित ।