पद्य - ८९ - साओन मे विरह

साओन मे विरह

रिमझिम - रिमझिम साओन बरिसय,

हहराबय अछि हिया सखि मोर ।

कारी – कारी     बादर     गरजय,

सिहराबय  अछि   पोरे – पोर ।।

दिन  दुपहरिया,  राति  निवीड़तम,

झंकृत मन – मृदंग  बड़  जोड़ ।

पी  संग  ओहिना  हमहूँ  नचितहुँ,

नाचय  जहिना   हर्षित  मोर ।।

पिक – रव, पी – पी मदन जगाबय,

गति मोर  जहिना चन्द्र चकोर ।

सखि हे !  भाग्य   हमर  बड़   निष्ठुर,

निर्दयि  केहेन   अछि  चितचोर ।।

सुरभित धरणि – रमणि – रुचि सुन्नर,

दादुर   टर्र – टर्र   करइछ   जोर ।

सिहकय   पुरिबा,    रहि – रहि   पछबा,

तरसैत राति  होइछ सखि भोर ।।

डॉ॰ शशिधर कुमर “विदेह”                                

“विदेह” पाक्षिक मैथिली इ – पत्रिका, वर्ष –५, मास –५५,  अंक –‍११० , ‍१५ जुलाई २०१२ मे “स्तम्भ ३॰२” मे प्रकाशित ।