पद्य - ‍१७८ - बागर (बाल कविता)

बागर (बाल कविता)

कोना करै छेँ - “बागर”  सनि,

बागर की होइ छै - से  बता ।

बागर - बागर   लोक  बाजैए,

बागर की - ककरो  ने पता ।।

जे   कहबेँ  -  पएबेँ   ईनाम,

सोचै जाइ जो सभ धियापुता ।

हारि गेलेँ,  तखने  हम कहबौ,

नञि तँऽ छी  हमरो ने पता ।।

एहिना बहुते  शब्द  मैथिलीक,

हेरा  गेल  ककरो  ने  पता ।

जे  बाँचल,  पैघो  ने  बाजए,

सीखतै   कोना   धियापुता ।।

नेनपनमे सुनलहुँ, पूछल,  पर

अर्थ  ने  बूझल छल ककरो ।

उत्कण्ठा  तकबाक  हिलोरल,

तेँ किछु बूझल अछि हमरो ।।

“बागर”  परबा  केर  प्रजाति,

सन्दर्भ भेटल हमरा एक ठाँ ।*‍^१

उकपाती  आ  बड़  झगड़ौआ,

बड़ हल्ला रहितए जाहि ठाँ ।।*‍^२

संकेत आ किछु रोचक तथ्य -

*‍^१ - CSIR (आब NISCAIR) NEW DELHI द्वारा प्रकाशित पोथी WEALTH OF INDIA : BIRDS केर अनुसार “बागर” परबाक एक प्रजाति अछि, एकरहि "वन परवा/परेवा/परबा" सेहो कहल जाइत अछि । आब ई Endangered species केर सुचिमे आबि चुकल अछि । कल्याणी कोशक अनुसार “बागर” एक प्रकारक बकरी थिक । सम्भवतः दुहु अपना - अपना अनुसारेँ सही छथि आ “बागर” अनेकार्थी शब्द थिक ।

*‍^२ - एहि ठाम हम परबाक एकटा प्रजातिक रूपमे बागरकेँ लेल अछि जे स्वभावसँ बहुत झगरौआ, उकपाती आ हल्ला मचबए बला होइत छल आ परबाक प्रतियोगिता (परबाबाजी वा परबाक भिरन्त) केर उद्देश्यसँ पोषल जाइत छल ।

मैथिली पाक्षिक इण्टरनेट पत्रिका “विदेह” केर ‍199म अंक (‍15 अप्रील 2016) (वर्ष 9, मास 100, अंक ‍199) केर “बालानां कृते” स्तम्भमे प्रकाशित ।